Ibinida ng mga Grade 11 at 12 STEM students ng Quezon City Science High School kay Mayor Joy Belmonte ang kani-kanilang imbensyon na nagwagi sa iba-ibang patimpalak.
Ipinakita ng Grade 11 students na sina Kenzo Miguel Tayko, Mary Amanda Sante, Ayanna Michaella Girao, at Christan Kylde Encinares ang PINTIG o Preemptive Identification of Neointimal Tissue In Imaging for Gleaning Atherosclerotic Plaques through Convolutional Neural Network.
Isa itong AI-powered software na layong ma-detect nang maaga ang pamumuo ng plaque o bara sa puso na nagiging sanhi ng heart problems.
Nagwagi ang konseptong ito sa Robotics Intelligent Machines Individual Category noong 2024 Regional Science and Technology Fair (RSTF).
Mas epektibong wastewater treatment process naman sa tulong ng radiation-based filter media ang naging proyekto ng Grade 12 students na sina Marco Miguel Espiritu, Sam Pernito, Moddux Jarethy Quindoy, Shalom Amarie Villanueva, Isaiah Rafael de Guzman, at Anfernee Janssenn Enriquez.
Kinilala ang kanilang grupo sa 7th Young Innovators Program Forum ng Department of Science and Technology (DOST).
Kasama rin sa kanilang pagbisita sina Schools Division Superintendent Carleen Sedilla, Education Affairs Unit head Maricris Veloso, QC Youth Development Office head Dr. Eddilyn Dividina, QCSHS principal Mr. George Emanuel Martin, at kanilang research adviser na si Mr. Earl Francis Merilles.
