Nagdaos ng press conference ang Quezon City Tourism Department (QCTD), Quezon City Travel Agencies Association (QCTAA) at Department of Tourism-National Capital Region (DOT-NCR) upang ibahagi ang mga aktibidad para sa More To Explore Travel Expo na gaganapin sa darating na August 16-17, 2025.
Handog ng travel expo ang iba-ibang exclusive travel deals, accreditation caravan, cultural performances, at food at product booths na gawa sa Quezon City.
Magkakaroon din ng free guided tour sa piling mga museo ng lungsod tulad ng Bahay Modernismo at Tandang Sora Women’s Museum.
Layon ng expo na higit pang palakasin ang turismo sa lungsod, at hikayatin hindi lamang ang inbound at outbound travelers, kundi itampok pati ang mga magagandang lugar, kultura, at masasarap na pagkain sa Metro Manila, partikular sa Quezon City.
Nakibahagi sa press conference sina QCTD Acting Chief Tourism Operations Officer Giana Barata, DOT-NCR OIC-Assistant Regional Director Ivannovich Agote, QCTAA President Margie De Castro, QCTAA Travel Expo Chairman Aleth Agulto, at 2024 Miss Grand International CJ Opiaza. Naging kinatawan ni Mayor Joy Belmonte si District 1 Coun. TJ Calalay, chairperson ng Committee on Tourism, Cultural Affairs and Heritage.
